Fotoselekteerder

Wat is Fotoselekteerder?

Fotoselekteerder is 'n hulpmiddel op jou toestel wat beskikbaar is om te help identifiseer watter foto's op jou kamerarol as profielfoto's kan werk. Gebruik KI om vinnig foto's vir jou profiel te vind deur 'n selfie te neem of 'n bestaande foto van jou te gebruik en Fotoselekteerder die res te laat doen. Hierdie hulpmiddel sal tot jou beskikking wees wanneer jy inteken en te eniger tyd wanneer jy 'n profielfoto byvoeg. 

Hoe werk Fotoselekteerder?

Eerstens sal jy die biometriese data moet genereer wat gebruik word om foto's van jou op jou toestel te vind. Jy sal twee keuses hê—jy kan óf 'n profielfoto met jou gesig daarop gebruik, óf jy kan in plaas daarvan 'n selfie neem.

Tweedens selekteer die kenmerk foto's vanaf jou kamerarol wat as profielfoto's kan werk. Hierdie seleksie word gebaseer op wat ons geleer het 'n goeie profielfoto uitmaak, soos beligting, komposisie en meer. Die kenmerk filtreer ook groepfoto's uit, of foto's wat klaarblyklik ons Gebruiksbepalings en Gemeenskapsriglyne oortree.

Laastens sal jy kies watter van die foto's wat aangebied word na jou profiel opgelaai sal word. Onthou, hoewel hierdie hulpmiddel bedoel is om jou te help, is jy op die ou einde self verantwoordelik vir wat jy kies om op te laai, met inbegrip daarvan dat die foto's wat jy besluit om op te laai ons Gebruiksbepalings en Gemeenskapsriglyne nakom, en in ooreenstemming is met enige plaaslike wette wat van toepassing mag wees op jou gebruik van die Fotoselekteerder-hulpmiddel.

Onthou ook dat jy volledige of gedeeltelike toegang tot jou fotobiblioteek en toegang tot jou kamera sal moet verskaf vir hierdie eerste stap om te werk. Jy kan altyd jou instellings aanpas om die vlak van toegang aan te pas, of dit heeltemal te verwyder sodra jy klaar is.

Hoe gebruik Fotoselekteerder my data?

En hier is die beste deel daarvan. Die Fotoselekteerder-kenmerk werk geheel en al op jou toestel, en jy bly te alle tye in beheer. Kyk hier onder vir besonderhede oor hoe jou data in elke stap van die proses gebruik word:

• Die voorstel van 'n profielfoto: Fotoselekteerder gebruik nie biometriese data om 'n profielfoto voor te stel vir jou om vir hierdie kenmerk te gebruik nie. In plaas daarvan gebruik Tinder 'n instrument wat privaatheid behou om op te spoor watter van jou profielfoto's 'n buitelyn van 'n gesig het, sonder om enige biometriese data te genereer of besonderhede oor die kenmerke van jou gesig te versamel. Hierdie proses vind geheel en al op jou toestel plaas, en Tinder ontvang geen inligting oor in watter profielfoto's daar 'n gesig bespeur is nie. 
• Genereer en gebruik jou biometrie: Biometrie word gegenereer uit óf jou profielfoto óf jou video-selfie, en dan vergelyk met die foto's op jou kamerarol. Tinder versamel nie, stoor nie, verkry nie toegang tot of ontvang andersins enige biometrie wat gegenereer word vanaf jou selfievideo, profielfoto of foto's op jou kamerarol nie. In plaas daarvan vind alles geheel en al op jou toestel plaas, en alle biometriese data wat as deel van hierdie kenmerk gebruik word, word van jou toestel geskrap sodra jy die kenmerk verlaat.
• Skandering van jou foto's: Tinder versamel nie of verkry nie toegang tot enige foto's op jou kamerarol nie, en die proses om sekere foto's te skandeer en voor te stel vind geheel en al op jou toestel plaas. Tinder versamel slegs die foto's wat jy uiteindelik kies om na jou profiel op te laai.

Hoekom sien ek nie foto's van my saam met my vriende in die aanbevelings nie?

Fotoselekteerder is ontwerp om groepfoto's uit te sluit. Ons vra dat jy hierdie kenmerk gebruik om slegs foto's van jouself te vind.

Wat as ek nie van die foto's hou wat vir my aangebied word nie?

Indien dit gebeur dat Fotoselekteerder foto's aanbied wat jy dink nie jou beste is nie, deel asseblief jou terugvoer met ons op ons kontakvorm. Jou terugvoer speel 'n deurslaggewende rol om ons te help om die kenmerk te verbeter.

Waar is Fotoselekteerder beskikbaar?

Fotoselekteerder is wêreldwyd vir Android- en iOS-gebruikers beskikbaar.